ក្រុមហ៊ុន Honda បានបញ្ចេញគំរូរថយន្តថ្មីរបស់ខ្លួន ពីរម៉ូដែល មួយជាប្រភេទអគ្គិសនី និងមួយទៀតជាប្រភេទ Hybrid។
រថយន្តអគ្គិសនីថ្មីនោះ គឺជាម៉ូដែល e:Ny1 ដែលនឹងវាយលុកទីផ្សារ នៅក្នុងឆ្នាំ២០២៣។ Honda បញ្ជាក់ថា វាមានការឌីហ្សាញបែប Unique លើការឌីហ្សាញ គ្រឿងម៉ាស៊ីន និងបច្ចេកវិទ្យា ហើយនឹងក្លាយជាជម្រើសដ៏ល្អបំផុតសម្រាប់គ្រួសារ ដែលកំពុងស្វែងរកការប្រើប្រាស់ រថយន្តអគ្គិសនីជាលើកដំបូង។
យ៉ាងណាមិញ គេនៅមិនទាន់ដឹងលម្អិតអំពីគំរូរថយន្តនេះ នៅឡើយទេ ប៉ុន្តែវាអាចនឹងពាក់ព័ន្ធនឹងគំរូរថយន្តអគ្គិសនីម៉ូដែល e:NS1 និង e:NP1 ដែលបំពាក់អាគុយទំហំ ៦៨,៨គីឡូវ៉ាត់ម៉ោង អាចធ្វើដំណើរបានដល់ ៥០០គីឡូម៉ែត្រ ពេលសាកពេញ។
ចំណែកគំរូរថយន្តប្រភេទ Hybrid វិញ មិនទាន់មានឈ្មោះទេ ប៉ុន្តែបើតាមរូបភាពដែលបង្ហាញ គឺវាជាប្រភេទ SUV ដែលគេប៉ាន់ស្មានថា អាចជារថយន្ត HR-V ឆ្នាំ២០២៣ ហើយនៅខែក្រោយ Honda នឹងបញ្ចេញវាក្នុងពិព័រណ៌រថយន្ត New York Auto Show។
Honda បានលើកឡើងថា នៅក្នុងឆ្នាំ២០២៣ ក្រុមហ៊ុនខ្លួននឹងពង្រីកលទ្ធភាព នៃការប្រើប្រាស់បច្ចេកវិទ្យា Hybrid ពេញលេញ ដោយការបញ្ចេញ SUV ថ្មី។
ជាមួយគ្នានេះ គេក៏រំពឹងដែរថា រថយន្ត CR-V ជំនាន់ក្រោយឆ្នាំ២០២៣ នឹងមានជម្រើសម៉ាស៊ីន Hybrid និង Plug-in Hybrid ជាលើកដំបូងក្នុងតំបន់អឺរ៉ុប៕ Source: Sabay
