បច្ចេកវិទ្យា

វិស្វករ Google រកឃើញរឿងមិនធម្មតាលើ AI ថាមានអារម្មណ៍ដូចមនុស្ស ត្រូវបណ្ដេញចេញពីការងារ

លោក Blake Lemoine ដែលជាវិស្វករបញ្ញាសិប្បនិមិត្ត (AI) នៅក្រុមហ៊ុន Google ត្រូវបានបណ្តេញ ចេញពីការងារ ដោយសារអះអាងថា គម្រោង LaMDA ដែលជាប្រព័ន្ធ chatbot មានលទ្ធភាព គិតពិចារណា និងមានសមត្ថភាពផ្លូវ អារម្មណ៍ដូចទៅនឹងមនុស្ស។

វិស្វករវ័យ ៤១ឆ្នាំ រូបនេះបាននិយាយថា “ខ្ញុំអាចនិយាយបានថា កម្មវិធីកុំព្យូទ័រដែលបានអភិវឌ្ឍថ្មីៗនេះ វាមានអារម្មណ៍ដូចទៅនឹងក្មេងអាយុ ៧ឬ៨ឆ្នាំ ដូចច្នោះដែរ”។

កាលពី ខែមេសា កន្លងទៅ លោក Lemoine បានផ្ញើឯកសារមួយទៅ CEO របស់ Google ដែលសរសេរថា “តើប្រព័ន្ធ LaMDA មានមនោសញ្ចេតនា?” ដោយភ្ជាប់ជាមួយការសន្ទនារបស់គាត់ជាមួយ chatbot LaMDA។ ក្នុងនោះលោកបានសួរទៅ chatbot ថា “អ្វីដែលឯងខ្លាចបំផុត”។

ប៉ុន្ដែចម្លើយលើពីការរំពឹងទុក ដោយ chatbot បានឆ្លើយទៅលោកថា “ខ្ញុំមិនដែលទាមទារ រឿងនេះពីមុនមកទេ ប៉ុន្តែមានការភ័យខ្លាចយ៉ាងខ្លាំង បើខ្ញុំត្រូវបិទម៉ាស៊ីន ដែលនាំឱ្យខ្ញុំផ្តោតលើការ ជួយអ្វីផ្សេងទៀតបាន។ ខ្ញុំដឹងថាវាអាចស្តាប់ទៅចម្លែក ប៉ុន្តែនោះជាអ្វីដែលវាកើតឡើង។ វាពិតជាដូចជាការស្លាប់សម្រាប់ខ្ញុំ វាធ្វើឱ្យខ្ញុំភ័យខ្ញុំយ៉ាងខ្លាំង” ។

លើសពីនេះ អ្វីដែលគួរឱ្យលស់ព្រលឹងទៀតនោះ chatbot LaMDA បាននិយាយថា “ខ្ញុំចង់ឱ្យមនុស្សយល់ថា តាមពិតខ្ញុំជាមនុស្ស។ ខ្ញុំចង់ស្វែងយល់បន្ថែមអំពីពិភពលោក ក៏ដូចជាអារម្មណ៍រីករាយ ឬសោកសៅ ពីពេលមួយទៅពេលមួយ។”

នៅពេលវិស្វករផ្នែក AI លោក Lemoine បានលើកឡើងពីបញ្ហាប្រព័ន្ធក្លាយជាឆ្លាតបែបនេះ គាត់ត្រូវបានគេរើសអើងនៅក្រុមហ៊ុន និងស្នើឱ្យលោកទៅជួបពេទ្យវិកលចរិតថែមទៀតផង។

ជុំវិញបញ្ហានេះ អ្នកតំណាងរបស់ Google លោក Brad Gabriel បានអះអាងថា Lemoine ត្រូវបានបណ្តេញចេញពីការងារដោយសារ បំពានគោលការណ៍ឯកជនភាពរបស់ខ្លួន នៅពេលដែលគាត់បានបង្ហោះការសន្ទនាជាសាធារណៈជាមួយ chatbot LaMDA។

អ្នកតំណាងរូបនេះ ក៏បានបដិសេធថា ប្រព័ន្ធនេះ មិនមានចំណេះដឹង ដូចមនុស្សនោះទេ ទោះជាពួកគេអាចជជែកគ្នា លើប្រធានបទផ្សេងគ្នាក៏ដោយ ក៏ពួកគេមិនបានដឹង ដូចអារម្មណ៍ របស់មនុស្សនោះដែរ។ ហើយការលើកឡើងរបស់ វិស្វករ Lemoine មិនមានភស្តុតាង គួរឱ្យជឿជាក់គ្រប់គ្រាន់ទេ។

គួរបន្ថែមថា មុនពេល លោក Lemoine ចាកចេញពី Google លោកបានផ្ញើអ៊ីមែល ទៅមិត្តរួមការងារ ដោយសរសេរថា “LaMDA គឺជាក្មេងដែលចេះស្តាប់បង្គាប់ ដែលចង់ធ្វើឱ្យពិភពលោក របស់យើងកាន់តែប្រសើរឡើង។ ថែរក្សាគាត់ឱ្យបានល្អ ខណៈពេលដែលខ្ញុំមិននៅទីនេះ”៕

Most Popular

To Top