CNA៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២៥ ខែវិច្ឆិកា ឆ្នាំ២០២២ថា កាលពីថ្ងៃព្រហស្បតិ៍ លោក Elon Musk បានលើកឡើងថា បណ្តាញសង្គម Twitter នឹងផ្តល់ “ការលើកលែងទោសទូទៅ” ដល់គណនី ដែលត្រូវបានព្យួរ មិនឲ្យដំណើរការ នៅសប្តាហ៍ក្រោយ បន្ទាប់ពីដំណើរការស្ទង់មតិ ថាតើ ត្រូវធ្វើដូច្នេះសម្រាប់អ្នកប្រើប្រាស់ ដែលមិនបានបំពានច្បាប់ ឬចូលរួមក្នុងការផ្ញើសារឥត បានការជាច្រើននោះ ។
នៅក្នុងការស្ទង់មតិមួយ លោក Musk បានបង្ហោះនៅលើបណ្តាញសង្គម Twitter កាលពីថ្ងៃពុធ គឺមាន៧២,៤ភាគរយ នៃអ្នកប្រើប្រាស់ជាង ៣,១៦លាននាក់ ដែលបានចូលរួមបោះឆ្នោតគាំទ្រ ក្នុងការនាំយកមកវិញ នូវអ្នកដែលត្រូវបានផ្អាក ដោយវេទិកាប្រព័ន្ធ ផ្សព្វផ្សាយសង្គម ។
លោក Musk ដែលជាអ្នកបានទិញបណ្តាញសង្គម Twitter កាលពីខែមុនបានបង្ហោះសារនៅថ្ងៃព្រហស្បតិ៍ថា “ពលរដ្ឋបាននិយាយ” ។ “ការលើកលែងទោស ចាប់ផ្តើមនៅសប្តាហ៍ក្រោយ” ។
គួររំលឹកថា កាលពីសប្តាហ៍មុន លោក Musk ដែលជាមហាសេដ្ឋីមានជាងគេបំផុត របស់ពិភពលោក បានស្តារគណនីមួយចំនួនដែលត្រូវបានផ្អាកពីមុនមក រួមទាំងអតីតប្រធានាធិបតី សហរដ្ឋអាមេរិក ដូណាល់ ត្រាំ គេហទំព័រប្រមាថរបស់ Babylon Bee និងតារាកំប្លែង Kathy Griffin ផងដែរ ។
គាត់បានសរសេរនៅ ក្នុងខែតុលាថា បណ្តាញសង្គម Twitter នឹងបង្កើតក្រុមប្រឹក្សាសម្របសម្រួលមាតិកា “ជាមួយនឹងទស្សនៈចម្រុះយ៉ាងទូលំទូលាយ” ។ លោក Musk បានថ្លែងថា គ្មានការសម្រេចចិត្តលើ ខ្លឹមសារសំខាន់ៗ ឬការបញ្ចូលគណនីឡើងវិញ នឹងកើតឡើង មុនពេលក្រុមប្រឹក្សាត្រូវ បានកោះប្រជុំនោះទេ ។
ការផ្លាស់ប្តូរ និងភាពវឹកវរ បានកត់សម្គាល់រយៈពេល២-៣សប្តាហ៍ដំបូងរបស់មហាសេដ្ឋីថា ជាម្ចាស់បណ្តាញសង្គម Twitter ។ គាត់បានបណ្តេញអ្នកគ្រប់គ្រង ជាន់ខ្ពស់ រួមទាំងអតីតនាយកប្រតិបត្តិ Parag Agarwal ហើយត្រូវបានប្រកាសថា មន្ត្រីជាន់ខ្ពស់ទទួលបន្ទុកផ្នែកសន្តិសុខ និងឯកជនភាពបានលាឈប់ពីតំណែង ។
ការលាលែងពីតំណែងទាំងនោះបាន ទាក់ទាញការត្រួតពិនិត្យពីគណៈកម្មការពាណិជ្ជកម្ម សហព័ន្ធរបស់សហរដ្ឋអាមេរិក ដែលអាណត្តិរបស់ពួកគេរួម មានការការពារអ្នកប្រើប្រាស់ និងដែលបានលើកឡើងថា ខ្លួនកំពុងមើលបណ្តាញសង្គម Twitter ដោយមានការ”ព្រួយបារម្ភយ៉ាងខ្លាំង” ៕
