ក្រុមហ៊ុនវៀតណាម VinFast បានប្រកាសកាលពីថ្ងៃទី២៦ ខែមីនា ឆ្នាំ២០២៤ថា ខ្លួនគ្រោងលក់រថយន្តអគ្គិសនី របស់ខ្លួននៅប្រទេសថៃ នៅក្នុងរយៈពេលលលល២ខែទៀត ខណៈក្រុមហ៊ុននេះបានរឹតចំណង ជាមួយហាងលក់រថយន្តនានា ដើម្បីត្រៀមបើក Showroom រួចជាស្រេច។ នេះបើតាមការបញ្ជាក់លោកស្រី Vu Dang Yen Hang ប្រធានមន្រ្តីប្រតិបត្តិរបស់ VinFast Thailand ។
ចំពោះការលក់រថយន្តអគ្គិសនី នៅក្នុងប្រទេសថៃ ជាដំបូង ក្រុមហ៊ុន VinFast នឹងពឹងផ្អែកទៅលើក្រុមហ៊ុនដំឡើង ស្ថានីយសាកភ្លើងដែលមានស្រាប់ក្នុងប្រទេសនេះ ។ ប៉ុន្តែក្នុងផែនការរយៈពេលវែង VinFast នឹងសង់ស្ថានីយសាកភ្លើងខ្លួនឯងតែម្តង ដោយសហការជាមួយក្រុមហ៊ុន V-Green។
គួរដឹងថា V-Green គ្រោងចំណាយ ៤០៤លានដុល្លារ ក្នុងរយៈពេល ២ឆ្នាំក្រោយ ដើម្បីសង់ស្ថានីយសាកភ្លើងសម្រាប់រថយន្ត VinFast ក្នុងប្រទេសជាច្រើន ពោលគឺវានឹងជួយជំរុញដល់ការលក់រថយន្តរបស់ខ្លួន ខណៈក្រុមហ៊ុនវៀតណាមមួយនេះ មានគោលដៅលក់រថយន្តក្នុងទីផ្សារ ៥០ប្រទេសនៅទូទាំងពិភពលោក ត្រឹមចុងឆ្នាំ២០២៤នេះ ។
ក្នុងពិព័រណ៌យានយន្តអន្តរជាតិក្រុងបាងកក ឆ្នាំ២០២៤នេះ ក្រុមហ៊ុន VinFast បានដាក់បង្ហាញម៉ូតូអគ្គិសនី រថយន្តអគ្គិសនី SUV និងគំរូរថយន្តភីកអាប់អគ្គិសនី VF Wild ជាដើម ៕
