សិង្ហបុរី៖ ប្រទេសសឹង្ហបុរីបានរាយការណ៍ពីករណីឆ្លងថ្មីនៃជំងឺកូវីដ-១៩ ចំនួន ១៥,២៨៣ ករណីកាលពីថ្ងៃអាទិត្យ ដែលនាំឱ្យចំនួនសរុបកើនឡើងដល់ ៥៨២,៦៣៨ករណី នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ក្នុងចំណោមករណីថ្មី ៣១១៤ ករណីត្រូវបានរកឃើញតាមរយៈការធ្វើតេស្ត PCR និង ១២,១៦៩ករណី តាមរយៈ ARTs (ការធ្វើតេស្តរហ័ស antigen) នេះបើយោងតាមស្ថិតិដែលចេញផ្សាយដោយក្រសួងសុខាភិបាល។
ក្នុងចំណោមករណី PCR មាន ២៩៥៨ករណី គឺជាការឆ្លងក្នុងស្រុក និង ១៥៦ ករណីត្រូវបាននាំចូល។ ក្នុងចំណោមករណី ART ដែលមានរោគសញ្ញាស្រាល ហើយត្រូវបានវាយតម្លៃថា មានហានិភ័យទាប មានការឆ្លងក្នុងស្រុកចំនួន ១២,១១៣ករណី និងករណីនាំចូលចំនួន ៥៦ករណី។
ករណីសរុបចំនួន ១៥២៣ត្រូវបានបញ្ជូនទៅព្យាបាលនៅមន្ទីរពេទ្យ ដោយមាន ៣៩ ករណីនៅក្នុងអង្គភាពថែទាំដែលពឹងផ្អែកខ្លាំង។ យោងតាមក្រសួងបានឱ្យដឹងថា ការស្លាប់ចំនួន ៤នាក់ត្រូវបានរាយការណ៍ពីជំងឺកូវីដ-១៩ នៅក្នុងប្រទេសអាស៊ីអាគ្នេយ៍មួយនេះ កាលពីថ្ងៃអាទិត្យ ដែលនាំឱ្យចំនួនអ្នកស្លាប់ដោយសារជំងឺកូវីដ-១៩ កើនឡើងដល់ ៩៤៥ នាក់៕
ដោយ ឈូក បូរ៉ា
