បរទេស៖ តារាចម្រៀង ដ៏ល្បីល្បាញលោក Ed Sheeran កំពុងប្រឈមមុខនឹងការរិះគន់យ៉ាងខ្លាំង បន្ទាប់ពីអ្នករៀបចំ កម្មវិធីរបស់លោកបានដកសិល្បករម្នាក់ចេញពីបញ្ជីអ្នកសម្តែង ក្នុងកម្មវិធីប្រគុំតន្ត្រី ‘Loop Tour’ ។ ហេតុការណ៍នេះបានបង្កជាភាពចម្រូងចម្រាសយ៉ាងខ្លាំង ដោយមនុស្សជាច្រើនបានចោទប្រកាន់លោក Ed ថាមានការពាក់ព័ន្ធនឹងបញ្ហានយោបាយ នេះបើយោងតាមការចេញផ្សាយពីសារព័ត៌មាន Hollywood Life ចុះផ្សាយថ្ងៃទី ១៦ ខែកញ្ញា ឆ្នាំ២០២៦។
តារាចម្រៀងរ៉េប Macklemore ត្រូវបានដកចេញពីបញ្ជីអ្នកសម្តែងក្នុងការប្រគុំតន្ត្រី Loop Tour។ ទោះជាយ៉ាងណាក៏ដោយ ម្ចាស់បទ “Thinking Out Loud” រូបនេះបានអះអាងថា វាមិនមែនជាការសម្រេចចិត្តរបស់លោកនោះទេ។
តាមរយៈសារលើបណ្តាញសង្គម Instagram កាលពីថ្ងៃទី១៥ ខែកញ្ញា លោក Ed Sheeran បានពន្យល់ថា “មានហេតុផលដែលខ្ញុំមិនប្រើប្រាស់វេទិកាវិជ្ជាជីវៈរបស់ខ្ញុំសម្រាប់បញ្ហានយោបាយ គឺដោយសារតែទស្សនិកជនរបស់ខ្ញុំមានយុវជន និងកុមារមកពីមជ្ឈដ្ឋានផ្សេងៗគ្នា។ អ្នកដែលមកទស្សនាការប្រគុំតន្ត្រីរបស់ខ្ញុំ មិនរំពឹងថានឹងឃើញវេទិកានយោបាយនោះទេ។ ខ្ញុំគោរពគោលជំហររបស់ Macklemore ដែលហ៊ានក្រោកឈរ និងបញ្ចេញមតិសម្រាប់អ្វីដែលគាត់ជឿជាក់ ប៉ុន្តែយើងមានវិធីសាស្ត្រផ្សេងៗគ្នា ដើម្បីឆ្ពោះទៅរកគោលដៅតែមួយ នោះគឺសន្តិភាព។ ខ្ញុំជ្រើសរើសប្រើប្រាស់កេរ្តិ៍ឈ្មោះ និងវេទិការបស់ខ្ញុំជាកន្លែងសុវត្ថិភាព រក្សាភាពការទូត និងបើកចំហរការសន្ទនា។ ប្រសិនបើយើងគិតតែពីការស្រែកឱ្យខ្លាំងៗ នោះគ្មានអ្វីផ្លាស់ប្តូរឡើយ។”
លោកបានបន្ថែមថា បន្ទាប់ពីការសម្តែង របស់ Macklemore នៅរដ្ឋ New Jersey ម្ចាស់ទីតាំងប្រគុំតន្ត្រីបន្ទាប់ៗ បានព្រមានថា ពួកគេនឹងលុបចោលការប្រគុំតន្ត្រី ប្រសិនបើ Macklemore នៅតែបន្តចូលរួម។ លោក Ed ព្រមទាំងភាគីពាក់ព័ន្ធបានព្យាយាមចរចាពេញមួយសប្តាហ៍ ដើម្បីស្វែងរកដំណោះស្រាយ ប៉ុន្តែទីបំផុតការសម្រេចចិត្តរបស់ម្ចាស់ទីតាំង និងអ្នករៀបចំកម្មវិធី គឺជាការសម្រេចចិត្តចុងក្រោយ។
ក្រុមអ្នករៀបចំកម្មវិធី Messina Touring Group បានបញ្ជាក់ប្រាប់ទស្សនាវដ្តី Rolling Stone ថា ម្ចាស់ទីតាំងមិនអនុញ្ញាតឱ្យមានការប្រគុំតន្ត្រីដែលមានវត្តមាន Macklemore ឡើយ ដែលនេះអាចបណ្តាលឱ្យការប្រគុំតន្ត្រីទាំងមូលត្រូវលុបចោល និងប៉ះពាល់ដល់អ្នកគាំទ្ររាប់សែននាក់។
ការសម្រេចចិត្តនេះកើតឡើងបន្ទាប់ពីលោក Macklemore បានស្រែកពាក្យ “Free Palestine” (រំដោះប៉ាឡេស្ទីន) នៅចំពោះមុខទស្សនិកជន នៅរដ្ឋ New Jersey កាលពីថ្ងៃទី៤ ខែកញ្ញា។ នៅថ្ងៃបន្ទាប់ លោកបានថ្លែងសារ ទៅកាន់ជនជាតិជ្វីហ្វ (Jewish) ថា៖ “ការរិះគន់អ៊ីស្រាអែល ការរិះគន់ការរើសអើងពូជសាសន៍ និងការប្រឆាំងនឹងការប្រល័យពូជសាសន៍ មិនមែនជាការរិះគន់អ្នកនោះទេ។ សាររបស់ខ្ញុំគឺដើម្បីសន្តិភាព ក្តីស្រឡាញ់ និងការប្រព្រឹត្តចំពោះមនុស្សគ្រប់រូបដោយសេចក្តីថ្លៃថ្នូរ ការគោរព និងសមភាព។”
ជាការឆ្លើយតប សិល្បករដែលត្រូវសម្តែងបើកឆាកផ្សេងទៀត រួមមានតារាចម្រៀង Finneas, សិល្បករអៀរឡង់ Aaron Rowe ក្រុមតន្ត្រី Beoga និងក្រុមតន្ត្រីប៉ុបដាណឺម៉ាក Lukas Graham សុទ្ធតែបានប្រកាសដកខ្លួនចេញពីការប្រគុំតន្ត្រីនេះ ដើម្បីបង្ហាញសាមគ្គីភាពជាមួយ Macklemore។
លោក Finneas បានបញ្ជាក់លើបណ្តាញសង្គមថា៖ “សិល្បករមិនត្រូវស្ងៀមស្ងាត់ឡើយ នៅពេលដែលពួកគេបញ្ចេញមតិសម្រាប់អ្នកដែលត្រូវបានគេជិះជាន់។ ខ្ញុំសម្រេចចិត្តដកខ្លួនចេញពីការប្រគុំតន្ត្រីជាមួយ Ed Sheeran ហើយខ្ញុំឈរនៅខាងប៉ាឡេស្ទីន និងប្រជាជនរបស់ពួកគេ។”
ប្រែសម្រួល៖ គីរី
