ភ្នំពេញៈ ជាមួយនឹងភាពរីកចម្រើន នៃតំបន់ជ្រោយចង្វារ និងមានកំណើនប្រជាសាស្ត្រយ៉ាងច្រើន រដ្ឋបាលរាជធានីភ្នំពេញ បានបង្ហាញពីផែនការ ក្នុងការសាងសង់ផ្លូវថ្មីចំនួន៣ខ្សែបន្ថែមទៀត ដែលតភ្ជាប់ពីតំបន់គម្រោង ក្រុងរណបរបស់ក្រុមហ៊ុន OCIC ឆ្ពោះទៅកាន់តំបន់ក្រុងរណប របស់ក្រុមហ៊ុនលីយ៉ុងផាត ខណៈដែលពេលនេះមន្ត្រីជំនាញ កំពុងស្ថិតនៅក្នុងការសិក្សាលម្អិត ពីផលប៉ះពាល់នៃគម្រោង។
អភិបាលខណ្ឌជ្រោយចង្វារ លោកឃ្លាំង ហួត បានមានប្រសាសន៍ ប្រាប់តាមទូរស័ព្ទនៅល្ងាចថ្ងៃទី២៤ ខែកញ្ញា ឆ្នាំ២០២០កន្លងមកថា បច្ចុប្បន្ននេះមន្ត្រីជំនាញផ្នែកសាងសង់ រួមជាមួយនឹងបុគ្គលិកជំនាញ របស់ក្រុមហ៊ុនប្រឹក្សា គម្រោងកំពុងតែសិក្សាលម្អិតពីផលប៉ះពាល់ រួមជាមួយនឹងការប៉ាន់ស្មាន នៃខ្ទង់ចំណាយ ដើម្បីដាក់ជូនលោកអភិបាល រាជធានីភ្នំពេញ។
លោកបានបញ្ជាក់ថា “មុនដំបូងរដ្ឋបាលក្រុង បានលើកឡើងពីគម្រោងសាងសង់ផ្លូវថ្មី ត្រឹមតែ២ខ្សែប៉ុណ្ណោះ ប៉ុន្តែក្រោយពេលសិក្សាបឋម និងតម្រូវការប្រើប្រាស់ផ្លូវជាក់ស្ដែង ជាពិសេសសម្រាប់ត្រៀមសម្រួលការធ្វើចរាចរណ៍ ក្នុងឱកាសព្រឹត្តិការណ៍ធំៗជាប្រវត្តិសាស្ត្រចាប់ពីឆ្នាំក្រោយទៅ ក៏បានសិក្សាពីការសាងសង់ផ្លូវថ្មី រហូតដល់៣ខ្សែ” ។
លោកអភិបាលខណ្ឌ បានមានប្រសាសន៍បន្តទៀតថា ផ្អែកតាមភាពជាក់ស្ដែងនៃការអភិវឌ្ឍ និងរីកចម្រើនយ៉ាងឆាប់រហ័ស នៃតំបន់ជ្រោយចង្វារ ដែលធ្លាប់តែមានភាពស្ងប់ស្ងាត់ និងជាតំបន់លិចទឹក មកជាបណ្តុំលំនៅដ្ឋានទំនើប ប្រមូលផ្តុំជាទីតាំងធ្វើពាណិជ្ជកម្មយ៉ាងសកម្ម ជាពិសេសមានកំណើនប្រជាជនជាបន្តបន្ទាប់ រហូតដល់ជាង៧ម៉ឺននាក់នោះ បណ្តាញហេដ្ឋារចនាសម្ព័ន្ធជាច្រើនទៀត គ្រោងនឹងចាប់ផ្តើមសាងសង់បន្ថែម ។ កន្លងមកយើងបានដោះស្រាយបញ្ហាសំខាន់ៗ ដែលជាតម្រូវការចាំបាច់ប្រចាំថ្ងៃ របស់ប្រជាជន ដូចជាបញ្ហាបណ្តាញអគ្គិសនី បញ្ហាកង្វះទឹកស្អាត និងបញ្ហាបណ្តាញផ្លូវថ្នល់ជាដើម ប៉ុន្តែពេលនេះយើងបានដោះស្រាយរួចហើយ ហើយនឹងបន្តខិតខំអភិវឌ្ឍន៍បន្តទៀត ដើម្បីធ្វើយ៉ាងណាបង្កភាពងាយស្រួល ដល់ប្រជាជនរស់នៅក្នុងតំបន់ ក៏ដូចជាប្រជាពលរដ្ឋដែលចរាចរណ៍ឆ្លងកាត់ផងដែរ។
លោកស្រី អាន សុធីតា នាយិកាប្រចាំប្រទេសក្រុមហ៊ុន CBRE Cambodia ធ្លាប់បានមានប្រសាសន៍ បង្ហាពីក្ដីសាទរចំពោះភាពរីកចម្រើន និងអភិវឌ្ឍវិស័យសំណង់នៅក្នុងខណ្ឌជ្រោយចង្វារថា “ជ្រោយចង្វារ ជាខណ្ឌដែលមានសក្ដានុពល និងអំណោយផលដល់ការវិនិយោគផ្នែកសំណង់ ប៉ុន្តែអ្វីដែលជាឧបសគ្គចម្បងនោះ គឺកត្តាហេដ្ឋារចនាសម្ព័ន្ធ ជាពិសេសផ្លូវចេញចេញចូលទៅតំបន់ ដែលមានគម្រោងអភិវឌ្ឍន៍មានភាពចង្អៀត។
លោកស្រីបានបញ្ជាក់ថា “នៅតំបន់នេះភាគច្រើន ជាការអភិវឌ្ឍវិស័យលំនៅដ្ឋានបែបប្រណីតដែលមានតម្លៃមធ្យម និងកម្រិតខ្ពស់ ប៉ុន្តែបើស្ថិតនៅកៀកនឹងក្រុង គឺមានគម្រោងអភិវឌ្ឍន៍អគារពាណិជ្ជកម្ម និងអគារខុនដូធំៗ និងខ្ពស់ៗច្រើន។លោកស្រីបន្តថា “នៅទីនេះអំណោយផលល្អពីធម្មជាតិ ដូចជាមានទន្លេនៅអមសងខាង ផ្តល់ផាសុកភាពដល់ការរស់នៅ ប៉ុន្តែអ្វីដែលជាឧបសគ្គ គឺផ្លូវចេញចូលមានសភាពតូចចង្អៀតបន្តិច ប្រសិនបើការពង្រីក និងបង្កើតផ្លូវថ្មីបន្ថែម ភាពទាក់ទាញលើការវិនិយោគ នឹងកើនខ្លាំងជាងនេះទៅទៀត” ៕
ដោយ ៖ propertyarea
