ក្រចេះ រាជរដ្ឋាភិបាលកម្ពុជា តាមរយៈរដ្ឋបាលខេត្តក្រចេះ ក្រោមការគ្រប់គ្រងដោយក្រសួងរៀបចំដែនដីនគរូបនីយកម្ម និងសំណង់ នឹងធ្វើការការបែងចែកដីសម្បទានសង្គមកិច្ចចំនួន២៨៣០.៨៩ហិកតា ជូនដល់ប្រជាពលរដ្ឋក្រីក្រចំនួន៥៥៤គ្រួសារ រស់នៅក្នុងឃុំមួយចំនួន ស្ថិតក្នុងស្រុកចិត្របុរី ខេត្តក្រចេះ។
លោក ភឹម ភីរ៉ា អភិបាលរងខេត្ត និងជាប្រធានគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) ខេត្តក្រចេះ នៅថ្ងៃចុងសប្ដាហ៍កន្លងទៅបានមានប្រសាសន៍ ណែនាំដល់ប្រជាពលរដ្ឋ ដែលទទួលបានដីសម្បទានពីរាជរដ្ឋាភិបាល ដែលស្ថិតនៅក្នុងឃុំសំបុក និងឃុំចង្ក្រង់ ស្រុកចិត្របុរី ដាច់ខាតត្រូវតែយកទៅប្រើប្រាស់ឱ្យមានប្រសិទ្ធភាព សម្រាប់ទ្រទ្រង់ជីវភាពគ្រួសារ ដោយការតាំងទីលំនៅដ្ឋានឱ្យបានសមរម្យ និងប្រកបការដាំដុះដំណាំផ្សេង។
សម្រាប់ដីសម្បទានសង្គមកិច្ចនៅក្នុងឃុំសំបុក មានផ្ទៃដីដែលត្រូវបែងចែកជូនប្រជាពលរដ្ឋទំហំ២.៨៣០,៨៩ហិកតា ក្នុងនោះមានផ្ទៃដីលំនៅឋានទំហំ៤៤,៧១ហិកតា និងផ្ទៃដីកសិកម្មទំហំ១.១២១ហិកតា ហើយមានសម្បទានិកទទួលបានដីចំនួន៥៥៤គ្រួសារ។
បច្ចុប្បន្ន សម្បទានិកក្នុងឃុំសំបុកបានចូលតាំងទីលំនៅ និងប្រើប្រាស់ដីកសិកម្មចំនួន៥០៣ គ្រួសារលើ៥៥៤គ្រួសារស្មើនឹង៩០,៧៩% ។ចំណែកដីសម្បទានសង្គមកិច្ចឃុំចង្ក្រង់ មានផ្ទៃសម្រាប់បែងចែកសរុប១.០៧៥,៦៨ហិកតា ក្នុងនោះមានផ្ទៃដីលំនៅឋានទំហំ១៧,៤២ហិកតា និងផ្ទៃដីកសិកម្មទំហំ៦៦៦ហិកតា ហើយមានសម្បទានិកទទួលបានដីចំនួន៣៣១គ្រួសារ។
បច្ចុប្បន្នសម្បទានិក ក្នុងឃុំសំបុកបានចូលតាំងទីលំនៅ និងប្រើប្រាស់ដីកសិកម្មចំនួន២៧៦គ្រួសារ លើ៣៣១គ្រួសារ ស្មើនឹង៨៣,៣៨% ។
លោកអភិបាលរងខេត្តបានបញ្ជាក់ឱ្យដឹងថា រាជរដ្ឋាភិបាលបានយកចិត្តទុកដាក់ និងគិតគូរពីសុខទុក្ខ និងជីវភាពរស់នៅរបស់ប្រជាពលរដ្ឋក្រីក្រខ្វះខាតដី ហើយគម្រោង LASED ត្រូវបានបង្កើតឡើងក្រោមកិច្ចព្រមព្រៀង រវាងរាជរដ្ឋាភិបាលកម្ពុជា ជាមួយនឹងភ្នាក់ងារអភិវឌ្ឍន៍អន្តរជាតិ (IDA-WB) ត្រូវអនុវត្តន៍រយៈពេល៥ឆ្នាំ ចាប់ពីខែសីហា ឆ្នាំ២០១៦ ដល់ខែធ្នូ ឆ្នាំ២០២១ ក្រោមថវិកាសរុប២៦,៨៦ លានដុល្លារអាមេរិក ដោយក្នុងនោះថវិកាបដិភាគ របស់រាជរដ្ឋាភិបាលកម្ពុជាមានចំនួន១,៨០ លានដុល្លារអាមេរិក គឺដើម្បីផ្តល់នូវបំនិន ដល់បងប្អូនប្រជាពលរដ្ឋ ឱ្យចេះដាំដុះប្រកបរបរកសិកម្មដោយជំនាញ និងបច្ចេកទេសសមស្រប ។
សម្រាប់គោលការណ៍ នៃការទទួលបានប័ណ្ណកម្មសិទ្ធិដីធ្លី ស្របច្បាប់ទៅតាមលក្ខខណ្ឌ ក្នុងនោះបងប្អូនសម្បទាននិកត្រូវធ្វើការដាំដុះ និងសាងសង់លំនៅឋានសម្រាប់ស្នាក់នៅជាអចិន្ត្រិយ៍នៅលើដីលំនៅឋាន ដោយមានដាំដំណាំបន្ថែ ដំណាំហូបផ្លែ ផ្ទះត្រូវមានរបង និងមានការចិញ្ចឹមសត្វជាដើម។ ដោយឡែកសម្រាប់ដីកសិកម្ម បងប្អូនសម្បទានិកត្រូវបង្ករបង្កើនផល ដាំដំណាំកសិកម្មផ្សេងៗឱ្យបានទៀងទាត់ និងត្រូវប្រើប្រាស់ដីកសិកម្មឱ្យបានពេញលេញ។
លោក ភឹម ភីរ៉ា បានបញ្ជាក់ថា“សម្រាប់ទីតាំងដីសម្បទានសង្គមកិច្ច ទាំង២ឃុំខាងលើនេះដែរ ឃើញថាជាទីតាំងល្អ ស្ថិតនៅជិតនឹងផ្លូវជាតិ ដែលជាកក្តាអំណោយផលដល់បងប្អូនក្នុងការដាំដំណាំ និងដឹកជញ្ជូនកសិផលចេញចូលដីរបស់ខ្លួន ក៏ដូចជាអាចធ្វើការដាក់លក់ដូរនូវកសិផល ដែលបងប្អូនសម្បទានិកផលិតបាន នៅតាមដងផ្លូវបានដោយងាយស្រួល” ។
នៅក្នុងក្នុងរបាយការណ៍ដដែលបានបញ្ជាក់ផងដែរថា ចំនួនគ្រួសារសម្បទានិក ដែលប្រើប្រាស់ដី មិនទាន់គ្រប់លក្ខខណ្ឌ ដែលត្រូវបានប័ណ្ណកម្មសិទ្ធិ មានឃុំសំបុក ១៧៣គ្រួសារ ឃុំចង្ក្រង់៣៦គ្រួសារ។ ម្យ៉ាងវិញទៀត ចំពោះបងប្អូនសម្បទានិក ដែលទើបចូលមកឈួសឆាយ និងសម្អាតដីដើម្បីសាងសង់លំនៅឋាន និងធ្វើកសិកម្មត្រូវរួសរាន់ទៅធ្វើកិច្ចសន្យាចូលមកស្នាក់នៅ និងប្រើប្រាស់ដីនៅសាលាឃុំសំបុក និងសាលាឃុំចង្ក្រង់ ដើម្បីធានាថា បងប្អូនសម្បទានិក ចូលប្រើប្រាស់ដីទាំងនោះវិញពិតប្រាកដមែន៕ប្រភព៖propertyarea.asia
