រដ្ឋ New Jersey៖តារាចម្រៀងប៉ុប ជនជាតិអង់គ្លេស លោក Ed Sheeran បានបាត់បង់ក្រុមតន្ត្រីករទាំងអស់ ដែលបានកក់ទុក សម្រាប់សម្តែងបើកឆាកក្នុងការប្រគុំតន្ត្រី នាពេលខាងមុខរបស់លោក បន្ទាប់ពីតារារ៉េប Macklemore ត្រូវបានដកចេញពីបញ្ជីសម្តែង ដោយសារតែការថ្លែងគាំទ្រប៉ាឡេស្ទីន ខណៈក្រុមតន្ត្រីករ Finneas, Aaron Rowe, Beoga និង Lukas Graham សុទ្ធតែបានដកខ្លួនចេញដើម្បីបង្ហាញការតវ៉ា ។
លោកបាននិយាយទៅកាន់ទស្សនិកជនថា ជម្លោះនេះបានផ្ទុះឡើង បន្ទាប់ពីលោក Macklemore មានឈ្មោះពិតថា Ben Haggerty បានចូលរួមក្នុងដំណើរកម្សាន្តតន្ត្រី “Loop tour” របស់ Sheeran នៅកីឡដ្ឋាន MetLife រដ្ឋ New Jersey កាលពីដើមខែនេះ។ “Free Palestine” មុនពេលសម្តែងបទ “Hind’s Hall” ជាបទចម្រៀងតវ៉ារបស់គាត់អំពីសង្គ្រាមនៅហ្គាហ្សា ហើយក្រោយមកលោកបាននិយាយថា លោកត្រូវបានដកចេញពីកាលវិភាគសម្តែងដែលនៅសល់ បន្ទាប់ពីទីតាំងប្រគុំតន្ត្រីមួយចំនួនបានជំទាស់នឹងការចូលរួមរបស់លោក។
លោក Finneas បានប្រកាសកាលពីថ្ងៃអង្គារថា គាត់នឹងដកខ្លួនចេញពីការសម្តែងដែលបានគ្រោងទុក ដោយបញ្ជាក់ថាគាត់ឈរនៅ “ខាងប៉ាឡេស្ទីន និងប្រជាជនរបស់ខ្លួន”។
តន្ត្រីករដែលធ្លាប់ឈ្នះពានរង្វាន់ Grammy រូបនេះបានសរសេរនៅលើបណ្តាញសង្គម Instagram ថា សិល្បករមិនត្រូវត្រូវបានគេបំបិទមាត់ឡើយ នៅពេលដែលពួកគេនិយាយការពារអ្នកដែលត្រូវបានគេជិះជាន់។
បន្ទាប់មក តារាចម្រៀងជនជាតិអៀរឡង់ Aaron Rowe បានប្រកាសដកខ្លួន ដោយលើកឡើងថា លោកមិនអាចបន្តចូលរួមក្នុងដំណើរប្រគុំតន្ត្រីនេះបានទេ ខណៈបុគ្គលមានទ្រព្យសម្បត្តិស្តុកស្តម្ភព្យាយាមបំបិទមាត់សិល្បករដែលនិយាយអំពីបញ្ហានៅតំបន់ហ្គាហ្សា (Gaza)។ លោកបានសរសេរថា លោក Ed គឺជាមិត្តភក្តិដ៏ល្អម្នាក់សម្រាប់ខ្ញុំ និងបានផ្លាស់ប្តូរជីវិតរបស់ខ្ញុំ ហើយខ្ញុំពិតជាមិនអាចថ្លែងអំណរគុណគាត់បានគ្រប់គ្រាន់ឡើយចំពោះរឿងនេះ។ បន្ទាប់មក លោកក៏បានថ្កោលទោសចំពោះការសម្លាប់ជនស៊ីវិលផងដែរ។
ក្រុមតន្ត្រីអៀរឡង់ Beoga និងក្រុមតន្ត្រីដាណឺម៉ាក Lukas Graham ក៏បានសម្រេចចិត្តដកខ្លួនចេញពីកម្មវិធីនេះដែរ។ ក្រុម Lukas Graham បានលើកឡើងថា លុយកាក់មិនផ្តល់សិទ្ធិឲ្យអ្នកក្នុងការគ្រប់គ្រង ឬកំណត់ការជជែកពិភាក្សានោះទេ៕
