ឥណ្ឌូនេស៊ីបានដាក់ទោស អតីតរដ្ឋមន្ត្រីខុទ្ទកាល័យម្នាក់ ឱ្យជាប់ពន្ធនាគារ ១២ឆ្នាំ បន្ទាប់ពីរកឃើញថា គាត់មានពិរុទ្ធពីបទទទួលសំណូក ទាក់ទងនឹងការចែកចាយជំនួយកូវីដ របស់រដ្ឋាភិបាល ។
អតីតរដ្ឋមន្ត្រីក្រសួងសង្គមកិច្ចលោក Juliari Batubara ត្រូវបានចាប់ខ្លួនកាលពីខែធ្នូ បន្ទាប់ពីលោកបានចូលខ្លួន សារភាពនៅគណៈកម្មការលុបបំបាត់អំពើពុករលួយគឺតែប៉ុន្មានម៉ោង បន្ទាប់ពីប្រធានគណៈកម្មការនេះ បានអំពាវនាវជាសាធារណៈឱ្យចូលបង្ហាញខ្លួន ។
ការចាប់ខ្លួនរូបលោក Juliari Batubara បានកើតឡើងមួយថ្ងៃបន្ទាប់ពីគណៈកម្មការនេះ បានរារាំងការប៉ុនប៉ងប្រគល់វ៉ាលិស និងកាបូបស្ពាយចំនួន ៧ ដែលមានប្រាក់សុទ្ធចំនួន ១,៣លានដុល្លារទៅកាន់ក្រុមមន្ត្រីក្រសួង ជាច្រើនរូបទៀត ។ លោកត្រូវបានប្រធានាធិបតីចូកូ វីដូដូបណ្តេញចេញភ្លាមៗ។
តុលាការក៏បញ្ជាឱ្យ Juliari Batubara បង់ប្រាក់ពិន័យចំនួន ៥០០ លានរូពី (៣៤.៦៩០ ដុល្លារ) ហើយនិយាយថា លោកនឹងត្រូវជាប់ពន្ធនាគារថែម ៦ ខែទៀត ប្រសិនបើមិនបង់ប្រាក់ពិន័យ ៕
