វ៉ាស៊ីនតោន ៖ អ៊ុយក្រែន បានប្រើប្រព័ន្ធ បាញ់រ៉ុក្កែត HIMARS ដែលផ្តល់ ដោយសហរដ្ឋអាមេរិក “បានផ្លាស់ប្តូរថាមវន្ត” នៅក្នុងសង្រ្គាម របស់ខ្លួនប្រឆាំង នឹងរុស្ស៊ី នេះបើតាមការលើកឡើង របស់រដ្ឋមន្ត្រីការពារជាតិ អាមេរិក Lloyd Austin ក្នុងបទសម្ភាសន៍មួយនៅលើ CNN កាលពីថ្ងៃអាទិត្យ។
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានប្រឈមមុខនឹងការ ស្តីបន្ទោសពីអន្តរជាតិ នៅពេល ដែលលោកចាប់ផ្តើម “ប្រតិបត្តិការយោធាពិសេស” របស់លោកលើអ៊ុយក្រែន នៅថ្ងៃទី២៤ ខែកុម្ភៈ ។
មេដឹកនាំពិភពលោក ជាច្រើនបានថ្កោលទោស ការលុកលុយនេះ ដែលពួកគេចាត់ទុកថា ខ្វះយុត្តិកម្ម និងប្រឆាំងនឹងបទដ្ឋានអន្តរជាតិ។ សហរដ្ឋអាមេរិក ដែលជាសម្ព័ន្ធមិត្ត របស់អ៊ុយក្រែន បានផ្តល់ជំនួយមនុស្សធម៌ និងយោធាដល់ទីក្រុងគៀវ យ៉ាងច្រើនសន្ធឹកសន្ធាប់ ដើម្បីពង្រឹងកិច្ចខិតខំប្រឹងប្រែង ការពារជាតិរបស់ប្រទេសនេះ ។
រួមបញ្ចូលនៅក្នុងជំនួយយោធា របស់សហរដ្ឋអាមេរិក គឺ M142 High Mobility Artillery Rocket Systems (HIMARS) ដែលជាប្រព័ន្ធបាញ់គ្រាប់រ៉ុក្កែត ដែលមានរយៈចម្ងាយឆ្ងាយ ជាងគ្រាប់រ៉ុក្កែតផ្សេងទៀត នៅក្នុងកាំភ្លើងធំរបស់អ៊ុយក្រែន។
HIMARS ត្រូវបានផ្តល់កិត្តិយស ក្នុងការអនុញ្ញាតឱ្យប្រទេស នៅអឺរ៉ុបខាងកើតការពារទឹកដី របស់ខ្លួនបានប្រសើរជាងមុន ប្រឆាំងនឹងប្រទេសរុស្ស៊ី ហើយថែមទាំងចាប់ផ្តើម កិច្ចខិតខំប្រឹងប្រែងវាយលុករបស់ខ្លួន ដើម្បីដណ្តើមយកទឹកដី ដែលធ្លាប់កាន់កាប់ពីមុន នៅជិត Kharkiv និង Kherson មកវិញ។
លោក Austin ដែលជាឥស្សរជនសំខាន់ ដែលមើលការខុសត្រូវលើជំនួយ របស់សហរដ្ឋអាមេរិក ចំពោះអ៊ុយក្រែនបានសរសើរទីក្រុងគៀវ សម្រាប់ការប្រើប្រាស់ HIMARS ជា “វិធីត្រឹមត្រូវ” ដើម្បីបង្កើនការការពារ របស់ខ្លួនប្រឆាំងនឹងទីក្រុងម៉ូស្គូ៕
ប្រែសម្រួល ឈូក បូរ៉ា
