រ៉ង់ហ្គូន៖ ប្រភពច្បាប់បានឲ្យដឆងថា តុលាការពិសេសដែលបង្កើតឡើង ដោយរដ្ឋាភិបាលយោធាមីយ៉ាន់ម៉ាកាលពីថ្ងៃពុធបានកាត់ទោសមេដឹកនាំ ដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី ឱ្យជាប់ពន្ធនាគាររយៈពេល ៣ឆ្នាំពីបទពុករលួយ ដោយបន្ថែមពេលវេលាសរុប ដែលតំណាងប្រជាធិបតេយ្យរូបនេះ នឹងត្រូវចំណាយពេលនៅពីក្រោយការឃុំឃាំង។
ការកាត់ទោសចុងក្រោយនេះ នាំមកនូវទោសជាប់ពន្ធនាគារ សរុបរបស់ជ័យលាភីណូបែលសន្តិភាពអាយុ ៧៧ឆ្នាំ កើនឡើងដល់ ២៦ឆ្នាំ។ លោកស្រីត្រូវបានកាត់ទោសរួចហើយ លើការចោទប្រកាន់ពីបទពុករលួយ ដាច់ដោយឡែក ក៏ដូចជាការញុះញង់ ការក្លែងបន្លំការបោះឆ្នោត ការរំលោភលើបទប្បញ្ញត្តិ នៃមេរោគឆ្លងថ្មី និងការនាំចូល និងប្រើប្រាស់ឧបករណ៍ទំនាក់ទំនងខុសច្បាប់។
លោកស្រី ស៊ូជី ដែលជានិមិត្តរូបនៃការប្រឆាំង លទ្ធិប្រជាធិបតេយ្យ ចំពោះយោធា ត្រូវបានឃុំខ្លួន និងកាត់ទោសលើការចោទប្រកាន់ជាច្រើន បន្ទាប់ពីយោធាបានទម្លាក់រដ្ឋាភិបាលជាប់ឆ្នោត តាមបែបប្រជាធិបតេយ្យ នៅក្នុងរដ្ឋប្រហារខែកុម្ភៈ ឆ្នាំ២០២១ ។
យោងតាមសេចក្តីសម្រេចកាលពីថ្ងៃពុធ លោកស្រីត្រូវបានគេចោទប្រកាន់ថា បានទទួលសំណូកជាង ៥៥ម៉ឺនដុល្លារពីអ្នកជំនួញនៅចន្លោះឆ្នាំ២០១៨ និង២០២០។
កាលពីខែមុន លោកស្រីត្រូវបានកាត់ទោស រួមជាមួយនឹងអតីតទីប្រឹក្សាសេដ្ឋកិច្ច របស់លោកស្រី ឲ្យជាប់ពន្ធនាគាររយៈពេល ៣ ឆ្នាំពីបទរំលោភច្បាប់សម្ងាត់ផ្លូវការ របស់ប្រទេស។
អ្នកគាំទ្រលោកស្រី ស៊ូជី បានឲ្យដឹងថា ការចោទប្រកាន់មកលើលោកស្រី ដែលលោកស្រីបដិសេធ សុទ្ធតែមានហេតុផលនយោបាយ។ រហូតមកដល់ពេលនេះ លោកស្រីត្រូវបានតុលាការ កាត់ទោសឲ្យជាប់ពន្ធនាគារក្នុងករណី ១៤ ផ្សេងគ្នា។
គួរបញ្ជាក់ថា ការកាត់ក្តីរបស់លោកស្រី ត្រូវបានធ្វើឡើងដោយបិទទ្វារនៅតុលាការ ដែលបង្កើតឡើង នៅខាងក្នុងពន្ធនាគារ ក្នុងរដ្ឋធានីណៃពិដោរ ជាកន្លែងដែលលោកស្រីកំពុងត្រូវបានឃុំខ្លួន៕ ប្រែសម្រួល ឈូក បូរ៉ា
