គៀវ៖ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានស្វាគមន៍ការសម្រេចចិត្ត របស់គណៈកម្មការអឺរ៉ុប ក្នុងការស្នើសុំកញ្ចប់ជំនួយ សម្រាប់អ៊ុយក្រែនរហូតដល់ ១៨ ពាន់លានអឺរ៉ូ (ប្រហែល ១៨ ពាន់លានដុល្លារ) សម្រាប់ឆ្នាំក្រោយ។
លោក ហ្សេឡិនស្គី បានសរសេរថា “សូមថ្លែងអំណរគុណ ចំពោះគណៈកម្មការអឺរ៉ុប និងប្រធានលោកស្រី Ursula von der Leyen ដែលបានប្រកាសកញ្ចប់ជំនួយហិរញ្ញវត្ថុ ១៨ ពាន់លានអឺរ៉ូ សម្រាប់ឆ្នាំ២០២៣” ។
លោកស្រីបានសង្កត់ធ្ងន់ថា កាយវិការនេះ បង្ហាញពីសាមគ្គីភាពពិត របស់សហភាពអឺរ៉ុប ជាមួយអ៊ុយក្រែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
នៅព្រឹកថ្ងៃដដែល គណៈកម្មការអឺរ៉ុប បានស្នើផ្តល់កញ្ចប់ជំនួយដល់អ៊ុយក្រែន ដោយលើកឡើងថា ជំនួយជាមធ្យម ១,៥ ពាន់លានអឺរ៉ូក្នុងមួយខែ នឹងជួយអ៊ុយក្រែន គ្របដណ្តប់ផ្នែកសំខាន់ នៃតម្រូវការមូលនិធិរយៈពេលខ្លីរបស់ខ្លួន សម្រាប់ឆ្នាំ២០២៣ ។
គួរបញ្ជាក់ថា សំណើនីតិបញ្ញត្តិ ដែលសំដៅលើការចែកចាយ កញ្ចប់ដោយរលូន ត្រូវការការយល់ព្រមពីសភាអឺរ៉ុប និងក្រុមប្រឹក្សាអឺរ៉ុប មុនពេលចូលជាធរមាន៕ ប្រែសម្រួល ឈូក បូរ៉ា
