ដាម៉ាស់៖ រដ្ឋមន្ត្រីការបរទេសស៊ីរីលោក Faisal Mekdad និងសមភាគីអ៊ីរ៉ង់លោក Hussein Amir-Abdollahian បានព្រមានរួមគ្នាទៅកាន់សហរដ្ឋអាមេរិក ប្រឆាំងនឹងការបង្កើនយោធារបស់ខ្លួន តាមព្រំដែនស៊ីរី-អ៊ីរ៉ាក់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
នៅក្នុងសន្និសីទសារព័ត៌មានមួយ ដែលបានធ្វើឡើងនៅក្នុងរដ្ឋធានីដាម៉ាស់ ប្រទេសស៊ីរី រដ្ឋមន្ត្រីទាំងពីរ បានសម្តែងការព្រួយបារម្ភ ចំពោះកិច្ចខិតខំប្រឹងប្រែង ជាក់ស្តែងរបស់អាមេរិក ក្នុងការប្រមូលផ្តុំកងកម្លាំង និងក្រុមឧទ្ទាមសម្ព័ន្ធមិត្តនៅតាមព្រំដែនស៊ីរី-អ៊ីរ៉ាក់ ចាប់ពីខេត្ត Hasakah ភាគឦសាន នៃប្រទេសស៊ីរី រហូតដល់តំបន់ភាគអាគ្នេយ៍ ក្បែរសហរដ្ឋអាមេរិកមូលដ្ឋាននៅ al-Tanf ។
លោក Mekdad បានលើកឡើងថា ទង្វើនេះបានរំលោភលើបទប្បញ្ញត្តិអន្តរជាតិ ហើយនឹងប្រឈមមុខនឹងភាពធន់របស់ស៊ីរី។ នៅក្នុងនោះដែរ Amir-Abdollahian បានបន្ទរពីការព្រួយបារម្ភរបស់លោក Mekdad ហើយបានណែនាំសហរដ្ឋអាមេរិក ឱ្យបញ្ឈប់ការបង្កគ្រោះថ្នាក់ដល់តំបន់។
អ្នកការទូតកំពូលរបស់អ៊ីរ៉ង់ បានឲ្យដឹងថា “យើងណែនាំទាហានអាមេរិកឱ្យត្រឡប់ទៅស្រុកកំណើតរបស់ពួកគេវិញ ហើយមេដឹកនាំអាមេរិក ឱ្យចាកចេញពីតំបន់ ហើយគិតពីអាជីវកម្ម ផ្ទាល់ខ្លួនរបស់ពួកគេ” ។
ថ្មីៗនេះ ក្រុមសកម្មជនប្រឆាំងស៊ីរី បានរាយការណ៍ថា សហរដ្ឋអាមេរិក គ្រោងនឹងរឹតបន្តឹងការគ្រប់គ្រងរបស់ខ្លួនលើព្រំដែនស៊ីរី-អ៊ីរ៉ាក់ ដើម្បីទប់ស្កាត់ឥទ្ធិពលអ៊ីរ៉ង់ នៅក្នុងតំបន់ ៕
ប្រែសម្រួល ឈូក បូរ៉ា
