អ៊ីស្លាម៉ាបាដ៖ តុលាការប្រទេសប៉ាគីស្ថាន នៅថ្ងៃពុធនេះបានកាត់ទោសអតីតនាយករដ្ឋមន្ត្រីរបស់ប្រទេសនេះ លោក Imran Khan និងភរិយា របស់លោកជាប់ពន្ធនាគាររយៈពេល ១៤ឆ្នាំនៅក្នុងសំណុំរឿង អំណោយក្រោមការចោទ ប្រកាន់ពីបទទទួលយក និងលក់អំណោយពី Toshakhana ដោយខុសច្បាប់។
Toshakhana គឺជាឃ្លាំងមួយ នៅក្នុងប្រទេសប៉ាគីស្ថាន ដែលអំណោយ ដែលប្រគល់ទៅឱ្យមន្ត្រីរដ្ឋាភិបាល ពីមន្ត្រីបរទេសត្រូវបានរក្សាទុក ហើយបន្ទាប់មកលក់ទៅឱ្យមន្ត្រី ដែលបង់ភាគរយជាក់លាក់នៃចំនួន និងជាក់ស្តែង។
តុលាការគណនេយ្យភាពក៏បានដកសិទ្ធិទាំងលោក Khan និងភរិយារបស់លោកសម្រាប់រយៈពេល ១០ឆ្នាំពីការកាន់កាប់ការិយាល័យសាធារណៈណាមួយ ហើយថែមទាំងបានពិន័យជាប្រាក់ចំនួន ៧៨៧ លានរូពី (២,៨ លានដុល្លារអាមេរិក) ក្នុងម្នាក់ៗផងដែរ។
កាលពីខែសីហាឆ្នាំមុន លោក Khan ត្រូវបានចាប់ខ្លួននិងបញ្ជូនទៅពន្ធនាគារបន្ទាប់ពីតុលាការក្នុងតំបន់ក្នុងទីក្រុងអ៊ីស្លាម៉ាបាដ បានកាត់ទោសលោកឲ្យជាប់ពន្ធនាគាររយៈពេល ៣ឆ្នាំពីបទលាក់ទ្រព្យសម្បត្តិហិរញ្ញវត្ថុរបស់លោក។
កាលពីថ្ងៃអង្គារ តុលាការពិសេសមួយ ដែលត្រូវបានបង្កើតឡើងក្រោមច្បាប់សម្ងាត់ផ្លូវការបានកាត់ទោសលោក Khan និងអតីតរដ្ឋមន្ត្រីការបរទេសលោក Shah Mehmood Qureshi ឱ្យជាប់ពន្ធនាគាររយៈពេល ១០ឆ្នាំពីបទរំលោភលើអាថ៌កំបាំងរដ្ឋ៕
ប្រែសម្រួល ឈូក បូរ៉ា
