ខ្សែបម្រើ Paul Pogba ត្រូវបានក្រុមជម្រើសជាតិបារាំង សន្និដ្ឋានថា អាចនឹងអវត្តមាន ពីប្រកួតចន្លោះពី ៦សប្ដាហ៍ ទៅដល់៨សប្ដាហ៍ ក្រោយមានបញ្ហា របួសភ្លៅខាងស្ដាំ។ នេះបើយោងតាមការចុះផ្សាយរបស់ BBC កាលពីម្សិលមិញនេះ។
កាលពីថ្ងៃច័ន្ទ ទី០៨ ខែវិច្ឆិកា ឆ្នាំ២០២១កន្លងទៅនេះ ក្នុងកំឡុងពេលដែលខ្សែបម្រើ កំពុងហ្វឹកហាត់ជាមួយក្រុមជម្រើសជាតិបារាំងរបស់ខ្លួនសុខៗ ដើម្បីត្រៀមប្រកួត World Cup វគ្គជម្រុះតទល់នឹងក្រុមជម្រើសជាតិ កាហ្សាក់ស្ថាន និងក្រុមជម្រើសជាតិហ្វាំងឡង់ ក៏ស្រាប់តែមានតែមានរបួសភ្លៅនេះ ហើយខាងជម្រើសជាតិបារាំង ក៏បានសម្រេចដកឈ្មោះចេញពីប្រកួតទាំងពីរនេះតែម្ដង។
នៅក្នុងថ្ងៃនេះ Pogba ក៏បានបង្ហោះពីស្ថានភាពរបួសរបស់ខ្លួន នៅលើបណ្ដាញសង្គម Instagram ផងដែរដោយបាននិយាយថា គេមានរបួសបន្តិចប៉ុណ្ណោះ ដោយរង់ចាំការពិនិត្យ ជាក់លាក់នៅថ្ងៃស្អែក ហើយសន្យាថា នឹងត្រលប់មកវិញ លេងឲ្យបានល្អជាងមុនៗទៀត។
គួរបញ្ជាក់ផងដែរថា បើ Pogba ពិតជាត្រូវការពេលព្យាបាលរបួស យូរដូចការសន្និដ្ឋាន ខាងលើមែន កីឡាករនេះអាចនឹងអវត្តមានពីប្រកួតច្រើនរហូត ដល់ចុងឆ្នាំនេះជាង ១២ប្រកួត៕ Source: Sabay