Manchester United កំពុងសម្លឹងលក់ចេញខ្សែការពារចំនួន៦នាក់ មុនពេលទីផ្សារដោះដូរកីឡាករត្រូវបិទក្នុងរយៈពេលមួយខែទៀត ស្របពេលអ្នកចាត់ការថ្មី Erik ten Hag កំពុងបន្តរៀបចំក្រុមឡើងវិញ។
ខ្សែការពារ Alex Telles, Aaron Wan-Bissaka, Erik Baily, Axel Tuanzebe, Ethan Laird និង Phil Jones សុទ្ធសឹងតែមិនសូវជាតម្រូវការនៅ Old Trafford។ ការមកដល់របស់ខ្សែការពារ Tyrell Malacia បានរុញ Telles ទៅរកទ្វារចាកចេញ។ Telles សញ្ជាតិប្រេស៊ីលមានការចាប់អារម្មណ៍ក្លឹប Sevilla ខណៈរូបគេទើបតែមកដល់ United បាន២ឆ្នាំប៉ុណ្ណោះ។
Wan-Bissaka ដែលបិសាចក្រហមទិញពី Crystal Palace ក្នុងតម្លៃខ្លួន៥០លានផោនកាលពីឆ្នាំ២០១៩ ហាក់បង្ហាញទម្រង់លេងមិនសូវល្អដូចដែលក្លឹបបានរំពឹងសោះ។ Crystal ពេលនេះចាប់អារម្មណ៍ចង់ខ្ចីជើងកីឡាកររបស់ខ្លួនត្រលប់ទៅវិញ ស្របពេល United មិនសូវប្រើការ។
កីឡាករចាស់វស្សា Jones ដែលញាំញីដោយសារបួសកំពុងត្រូវបានសម្លឹងឃើញពីក្លឹបនៅអាមេរិក D.C United ដែលដឹកនាំដោយអតីតមិត្តរួមក្រុម Wayne Rooney។ Baily សញ្ជាតិកូឌីវ័រ Man Utd ទិញមកកាលពីឆ្នាំ២០១៦ក្នុងតម្លៃខ្លួន៣០លានផោន កំពុងមានការចាប់អារម្មណ៍ពីក្លឹប៣គឺ AC Milan, Fulham និង Sevilla៕
