ក្រុមហ៊ុន Toyota ទើបតែបានប្រកាស ចេញរថយន្តស៊េរីឆ្នាំ២០២៤ របស់ខ្លួនមួយម៉ូឌែលទៀតហើយ គឺម៉ូឌែល Land Cruiser ដែលបានកែរូបរាងថ្មីទាំងស្រុង។ ប៉ុន្តែអ្វីដែលគួរឱ្យកត់សម្គាល់បំផុតនោះ រូបរាងរបស់រថយន្ត Land Cruiser ឆ្នាំ២០២៤នេះ គឺស្រដៀងនឹងរូបគំរូ (Concept) រថយន្តអគ្គិសនីមួយដែល Toyota បានបង្ហាញចេញកាលពីចុងឆ្នាំ២០២១ ដែលវាមានឈ្មោះថា Toyota Compact Cruiser EV។
យ៉ាងណាមិញ វាពុំមែនជាលើកទីមួយទេ ដែល Toyota យក Concept រថយន្តអគ្គិសនីអនាគត មកដាក់លើ Land Cruiser 2024 ដែលប្រើម៉ាស៊ីនសាំង Hybrid នេះ ពោលគឺ កាលពីប៉ុន្មានខែមុន Toyota ក៏បានបញ្ចេញរថយន្តស៊េរីឆ្នាំ២០២៤ ២ម៉ូឌែលទៀត ដែលសុទ្ធតែមានរូបរាងដូច Concept រថយន្តអគ្គិសនីផងដែរ ។
កាលពីខែមិថុនា Toyota បានបញ្ចេញផ្លូវការរថយន្ត C-HR 2024 នៅតំបន់អឺរ៉ុប ប្រើម៉ាស៊ីន Plug-in Hybrid។ រូបរាងរបស់វា គឺដូចហ្នឹង Concept រថយន្តអគ្គិសនី Toyota bZ Compact SUV។
ជាមួយគ្នានោះ កាលពីខែឧសភា Toyota ក៏បានបញ្ចេញរថយន្តភីកអាប់ថ្មី គឺ Tacoma 2024 ដែលមានជម្រើសប្រើ Hybrid ផងដែរ។ រូបរាងរថយន្តនេះ គឺដូចខ្លាំងណាស់នឹង Concept រថយន្ត Toyota Pickup EV។
សូមរំលឹកថា កាលពីខែធ្នូឆ្នាំ២០២១ ក្រុមហ៊ុន Toyota និង Lexus បានរួមគ្នាបង្កើតព្រឹត្តិកាណ៍ដ៏គួរឱ្យភ្ញាក់ផ្អើលបំផុត ដោយការបញ្ចេញរថយន្តអគ្គិសនីសម្រាប់អនាគត ១៥ម៉ូដែលតែម្តង ដែលជាប្រភេទ sedan, SUV, ភីកអាប់ វែន និងស្ព័រ។ ប៉ុន្តែតាមរយៈការបញ្ចេញរថយន្តស៊េរីឆ្នាំ២០២៤ ពីរបីម៉ូឌែលចុងក្រោយនេះ យើងអាចសន្និដ្ឋានបានថា Toyota នៅមិនទាន់ហ៊ានលូកចូលជ្រៅក្នុងការផលិតរថយន្តអគ្គិសនីនៅឡើយទេ ពោលគឺ រូប Concept រថយន្តទាំងនេះ នឹងត្រូវបម្លែងទៅជារថយន្ត Hybrid ឬ Plug-in Hybrid វិញម្តងមួយៗជាក់ជាមិនខាន៕
