នៅទីក្រុងហាណូយ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ការប្រគុំតន្ត្រីរបស់ក្រុមតារាចម្រៀងស្រីកូរ៉េខាងត្បូង Blackpink ចុងសប្តាហ៍នេះនៅទីក្រុងហាណូយអាចដកហូតអាជ្ញាប័ណ្ណរបស់ពួកគេ ពីព្រោះអ្នករៀបចំមិនបានទទួលបានការអនុញ្ញាតិរក្សាសិទ្ធិ និងបង់ថ្លៃសួយសារអាករ។
មជ្ឈមណ្ឌលវៀតណាម សម្រាប់ការការពារការរក្សាសិទ្ធិតន្ត្រី (VCPMC) បានប្រកាសកាលពីថ្ងៃព្រហស្បតិ៍ថា ខ្លួនបានស្នើឲ្យគណៈកម្មាធិការប្រជាជនទីក្រុងហាណូយ និងនាយកដ្ឋានវប្បធម៌ និងកីឡាក្រុងលុបចោលការសម្តែងនៅថ្ងៃសៅរ៍ និងថ្ងៃអាទិត្យនៅពហុកីឡដ្ឋានជាតិ My Dinh នៃរដ្ឋធានី ដោយសារការរំលោភលើសិទ្ធិអ្នកនិពន្ធ។
តំណាងមន្ទីរវប្បធម៌ និងកីឡាហាណូយបាននិយាយថា ពួកគេនឹងស៊ើបអង្កេតបញ្ហានេះបន្ថែមទៀត។
យោងតាម VCPMC ថា អ្នករៀបចំការប្រគុំតន្ត្រី IME បានបរាជ័យក្នុងការទទួលបានការអនុញ្ញាត និងបង់ថ្លៃសួយសារដែលត្រូវការអាជ្ញាប័ណ្ណរក្សាសិទ្ធិសម្រាប់ការប្រើប្រាស់សម្ភារៈរបស់ Blackpink នៅវៀតណាម។ VCPMC កំពុងតំណាងឲ្យសមាគមរក្សាសិទ្ធិតន្ត្រីកូរ៉េខាងត្បូង (KOMCA) ក្រោមកិច្ចព្រមព្រៀងដែលផ្តល់សិទ្ធិឲ្យ VCPMC ផ្តល់អាជ្ញាប័ណ្ណសិទ្ធិអនុវត្តជាសាធារណៈ នៃការងារទាំងអស់ក្នុងផលប័ត្ររបស់ KOMCA ដើម្បីអនុវត្តនៅក្នុងទឹកដីរបស់ VCPMC ។
VCPMC គឺជាទីភ្នាក់ងារតែមួយគត់ក្នុងប្រទេសវៀតណាម ត្រូវបានអនុញ្ញាតដោយ KOMCA នៅពេលនេះ។
KOMCA បាននិយាយថា ប្រសិនបើអាជ្ញាប័ណ្ណរក្សាសិទ្ធិមិនត្រូវបានផ្តល់ឲ្យមុនពេលការប្រគុំតន្ត្រី KOMCA ស្នើសុំឲ្យ IME បញ្ឈប់ការរៀបចំការសម្ដែងស្នាដៃជាកម្មសិទ្ធិរបស់ KOMCA។
VCPMC បាននិយាយថា នៅពេលការប្រគុំតន្ត្រី Blackpink នៅទីក្រុងហាណូយត្រូវបានប្រកាស ទីភ្នាក់ងារនេះបានទាក់ទងទៅ IME ហើយសុំឲ្យពួកគេបង់ថ្លៃសិទ្ធិសម្រាប់ការរក្សាសិទ្ធិ ទោះយ៉ាងណាក៏ដោយ គិតត្រឹមថ្ងៃទី ១៩ ខែកក្កដា IME មិនបានទទួលការអនុញ្ញាតសម្រាប់ការរក្សាសិទ្ធិនោះទេ។
កាលពីថ្ងៃព្រហស្បតិ៍ VCPMC បានទទួលអ៊ីម៉ែលពីអ្នកគ្រប់គ្រងគម្រោង IME លោក Pham Tam ដោយនិយាយថា ការរក្សាសិទ្ធិចំពោះបទចម្រៀងទាំងអស់ត្រូវបានប្រើប្រាស់សម្រាប់ការប្រគុំតន្ត្រីពិតជាគ្រប់គ្រងដោយក្រុមហ៊ុនគ្រប់គ្រងរបស់ Blackpink YG Entertainment ដូច្នេះហើយ IME មិនមានកាតព្វកិច្ចបង់ថ្លៃ VCPMC ទេ៕ ដោយ៖លី ភីលីព
