ញូវយ៉ក៖យោងតាមការចេញផ្សាយ ពីគេហទំព័រ Japan Today បានប្រាប់ឲ្យដឹងថា កំពូលតារាចម្រៀង និងអ្នកនិពន្ធបទចម្រៀងជនជាតិ អាមេរិក អ្នកនាង Taylor Swift បានប្រកាសចេញបទចម្រៀងថ្មីមួយ ដែលមានចំណងជើងថា “Patient Zero” ជាបទចម្រៀងដំបូងរបស់អ្នកនាងចាប់តាំង ពីពិធីមង្គលការដ៏អស្ចារ្យ កាលពីរដូវក្តៅកន្លងទៅ ហើយបទនេះនឹងត្រូវចេញផ្សាយនៅថ្ងៃសុក្រ។
អ្នកនាងបានធ្វើការប្រកាសនេះ តាមរបៀបដ៏ពិសេសរបស់នាងនៅព្រឹកថ្ងៃអង្គារ តារាចម្រៀងប៉ុបដ៏ល្បីល្បាញរូបនេះ បានដាក់ឲ្យដំណើរការការថយក្រោយមានលក្ខណៈអាថ៌កំបាំងនៅលើគេហទំព័ររបស់អ្នកនាង ដោយបទនេះត្រូវបានបង្ហាញនៅពីលើរូបភាពវាំងននពណ៌ក្រហម និងកំណត់ឲ្យបញ្ចប់នៅម៉ោង ២ រសៀល។
អ្នកគាំទ្រដ៏ស្មោះស្ម័គ្ររបស់អ្នកនាង ត្រូវគេស្គាល់ថា ជា “Swifties” បានចាប់ផ្តើមព្យាយាមបកស្រាយអត្ថន័យ នៃព័ត៌មានដែលនឹងមកដល់នេះយ៉ាងឆាប់រហ័ស ដោយពួកគេបានកត់សម្គាល់ឃើញថា ផ្នែកព័ត៌មានផ្ទាល់ខ្លួន (bio) នៅលើបណ្តាញសង្គម Instagram ផ្លូវការរបស់អ្នកនាងត្រូវបានផ្លាស់ប្តូរទៅជាឃ្លាថា “And, baby, that’s sh0w business f0r y0u” ដោយអក្សរ “o” នីមួយៗត្រូវបានជំនួសដោយលេខសូន្យ (0)។
ឥឡូវនេះ វាហាក់ដូចជាច្បាស់ណាស់ថា សកម្មភាពនោះគឺជាការបង្ហាញពីចំណងជើងនៃបទចម្រៀងថ្មី នៅពេលវេលាថយក្រោយបានបញ្ចប់ គេហទំព័ររបស់អ្នកនាងបានធ្វើការអាប់ដេតដោយបង្ហាញពីកំណែ CD ថ្មីចំនួន ៣ ប្រភេទដែលមានចំនួនកំណត់សម្រាប់បទចម្រៀងនេះ៖ មួយប្រភេទមានគម្របពីរជ្រុង ព្រមទាំងមានកំណែភ្លេងបែប Acoustic និងកំណែសម្រាប់ព្យាណូ ដោយលក់ក្នុងតម្លៃ ៣,៩៩ ដុល្លារក្នុងមួយបន្ទះ។
នេះគឺជាបទចម្រៀងថ្មីដំបូងរបស់នាង ចាប់តាំងពីនាងបានរៀបការជាមួយ Travis Kelce ជាកីឡាករក្រុម Kansas City Chiefs នៅឯ Madison Square Garden កាលពីខែកក្កដាមក។ អាល់ប៊ុមចុងក្រោយរបស់ Swift មានចំណងជើងថា “The Life of a Showgirl” ត្រូវបានចេញ ផ្សាយកាលពីខែតុលាឆ្នាំមុន ហើយនាងក៏បានចូលរួមច្រៀង បទចម្រៀងមួយសម្រាប់ខ្សែភាពយន្ត “Toy Story 5” កាលពីខែមិថុនាផងដែរ៕
