បរទេស៖ លោក Elon Musk ដែលជាបុរសមានបំផុតលើពិភពលោក បានឃើញទ្រព្យសម្បត្តិសរុបរបស់លោកកើនឡើងដល់ជាង ១ ទ្រីលានដុល្លារអាមេរិកម្ដងទៀត ខណៈដែលភាគហ៊ុនក្រុមហ៊ុន SpaceX និង Tesla របស់លោកបានកើនឡើងយ៉ាងខ្លាំង នេះបើតាមការចេញផ្សាយពីសារព័ត៌មាន VN Express ថ្ងៃទី៦ ខែតុលា ឆ្នាំ២០២៦ ។
ទស្សនាវដ្តី Forbes បានប៉ាន់ប្រមាណទ្រព្យសម្បត្តិរបស់លោក Elon Musk ថាមានចំនួន ១ ទ្រីលានដុល្លារកាលពីថ្ងៃចន្ទ ដែលជាការកើនឡើងចំនួន ៣០,៦ ពាន់លានដុល្លារ ធៀបនឹងថ្ងៃសុក្រ ដែលជាថ្ងៃជួញដូរទីផ្សារភាគហ៊ុនចុងក្រោយ។ កំណើននេះបានពង្រឹងតំណែងរបស់លោក Musk ជាបុគ្គលដែលមានជាងគេបំផុតលើពិភពលោក ដោយនាំមុខដាច់លោក Bezos ដែលឈរនៅលេខរៀងទី២ ជាមួយនឹងទ្រព្យសម្បត្តិ ៣៧១,៥ ពាន់លានដុល្លារ។
សហស្ថាបនិកក្រុមហ៊ុន Google លោក Larry Page ឈរនៅលេខរៀងបន្ទាប់ដោយមានទ្រព្យសម្បត្តិ ២៨៤,៣ ពាន់លានដុល្លារ ចំណែកឯប្រធានក្រុមហ៊ុន Dell Technologies លោក Michael Dell ឈរនៅលេខរៀងទី៤ ដែលមានទ្រព្យ ២៧២,២ ពាន់លានដុល្លារ។
យោងតាមសារព័ត៌មាន Bloomberg លោកបានក្លាយជាមហាសេដ្ឋីទ្រីលានដុល្លារ (trillionaire) ដំបូងគេបង្អស់លើពិភពលោកកាលពីខែមិថុនា ខណៈដែលភាគហ៊ុនក្រុមហ៊ុន SpaceX បានកើនឡើងយ៉ាងខ្លាំងបន្ទាប់ពីការបោះផ្សាយលក់ភាគហ៊ុនជាសាធារណៈលើកដំបូង (IPO) ក្នុងកម្រិតបំបែកកំណត់ត្រា ប៉ុន្តែលោកបានបាត់បង់តំណែងនេះវិញយ៉ាងឆាប់រហ័ស នៅពេលដែលភាគហ៊ុនបានធ្លាក់ចុះ ចំពេលមានក្តីបារម្ភអំពីការវាយតម្លៃតម្លៃដ៏ខ្ពស់របស់ក្រុមហ៊ុន។
ទ្រព្យសម្បត្តិរបស់លោកបានខិតជិតដល់កម្រិតទ្រីលានដុល្លារម្ដងទៀតក្នុងរយៈពេលប៉ុន្មានថ្ងៃថ្មីៗនេះ ដោយសារភាគហ៊ុនរបស់ក្រុមហ៊ុនទាំងពីរបានស្ទុះងើបឡើងវិញ។ ការប្រគល់រថយន្តនៅត្រីមាសទី៣ របស់ក្រុមហ៊ុន Tesla បានលើសពីការរំពឹងទុករបស់អ្នកវិភាគកាលពីសប្តាហ៍មុន ដែលបានជួយបង្កើនទ្រព្យសម្បត្តិរបស់លោក Musk ចំនួន ៦១ ពាន់លានដុល្លារ ត្រឹមតែក្នុងថ្ងៃសុក្រមួយប៉ុណ្ណោះ។
ភាគហ៊ុនរបស់ក្រុមហ៊ុន Tesla បានកើនឡើងជាង ១% កាលពីព្រឹកថ្ងៃចន្ទ ខណៈដែលភាគហ៊ុនក្រុមហ៊ុន SpaceX បានកើនឡើងជាង ៥%។ លោក Musk បានសរសេរនៅលើបណ្តាញសង្គម X ថា ក្រុមហ៊ុន SpaceXAI ដែលជាក្រុមហ៊ុនបុត្រសម្ព័ន្ធរបស់ SpaceX នៅពីក្រោយកម្មវិធី chatbot ឈ្មោះ Grok នឹងត្រូវប្តូរឈ្មោះទៅជា “SpaceXSI” ដែលសំដៅទៅលើ “បញ្ញាកំពូល” (super intelligence)។ ទោះជាយ៉ាងណាក៏ដោយ ក្រុមហ៊ុននេះហាក់ដូចជាមិនទាន់បានចាត់វិធានការផ្លូវការណាមួយ ដើម្បីប្តូរឈ្មោះយីហោនៅឡើយទេ គិតត្រឹមព្រឹកថ្ងៃចន្ទ។
ការប្រកាសនេះបានធ្វើឡើងបន្ទាប់ពីប្រធានាធិបតីសហរដ្ឋអាមេរិក លោក Donald Trump បានចុះហត្ថលេខាលើបទបញ្ជាប្រតិបត្តិមួយកាលពីសប្តាហ៍មុន ដោយណែនាំឱ្យរដ្ឋាភិបាលហៅ AI ថាជា “បញ្ញាកំពូល”។ លោក Musk នឹងទាក់ទាញចំណាប់អារម្មណ៍ពីប្រព័ន្ធផ្សព្វផ្សាយលើផ្នែកមួយផ្សេងទៀតក្នុងពេលឆាប់ៗនេះ នៅពេលដែលភាពយន្តឯកសាររឿង “Musk” ចាក់បញ្ចាំងនៅរោងភាពយន្តក្នុងខែនេះ។ ភាពយន្តនេះនឹងចាក់បញ្ចាំងជាលើកដំបូងនៅទីក្រុង New York និងទីក្រុង Los Angeles នៅថ្ងៃសុក្រ មុនពេលចាក់បញ្ចាំងនៅទូទាំងប្រទេសនាថ្ងៃទី១៦ ខែតុលា។
ប្រែសម្រួល៖ គីរី
