ទីក្រុងសេអ៊ូល ៖ តារាចម្រៀង និងអ្នកនិពន្ធបទភ្លេងអាមេរិកកាត់កូរ៉េ អ្នកនាង Ejae ដែលទទួលបានការចាប់អារម្មណ៍ខ្លាំងតាមរយៈបទ “Golden” ពីខ្សែភាពយន្តគំនូរជីវចលរបស់ Netflix “KPop Demon Hunters” បានរៀបអាពាហ៍ពិពាហ៍ជាមួយផលិតករតន្ត្រី និងជាអ្នកនិពន្ធបទភ្លេង លោក Sam Kim ហើយ នេះបើយោងតាមការចេញផ្សាយពីសារព័ត៌មាន Yonhap ថ្ងៃទី២០ ខែតុលា ឆ្នាំ២០២៦ ។
យោងតាមទស្សនាវដ្ដីម៉ូដសម្លៀកបំពាក់អាមេរិក Vogue បានរាយការណ៍កាលពីថ្ងៃចន្ទ (ម៉ោងនៅសហរដ្ឋអាមេរិក) ថា អ្នកទាំងពីរបានរៀបចំពិធីមង្គលការ ក្រៅអាគារកាលពីថ្ងៃសៅរ៍ នៅឯមជ្ឈមណ្ឌលវប្បធម៌ចម្រុះ (Stage 28) ក្នុងទីក្រុងសេអ៊ូល ដែលជាអតីតលំនៅដ្ឋាន របស់លោកតាខាងម្តាយរបស់ Ejae គឺលោក Shin Young-kyun ដែលជាតារាសម្ដែងជើងចាស់ដ៏ល្បីល្បាញ។
ដើមឡើយ គូស្វាមីភរិយាថ្មីថ្មោងមួយគូនេះ គ្រោងនឹងរៀបការនៅរដ្ឋកាលីហ្វ័រញ៉ា សហរដ្ឋអាមេរិក ក្នុងខែវិច្ឆិកា ខាងមុខនេះ ប៉ុន្តែក្រោយមកបានសម្រេចចិត្តផ្លាស់ប្តូរទីតាំងមកកាន់ប្រទេសកូរ៉េខាងត្បូងវិញ និងបានលើកថ្ងៃរៀបការឱ្យលឿនជាងមុនប្រហែលមួយខែ។ ការផ្លាស់ប្តូរនេះធ្វើឡើងបន្ទាប់ពីពួកគេត្រូវពន្យារពេលរៀបការជាបណ្តោះអាសន្ន ដោយសារតែភាពមមាញឹកក្នុងកាលវិភាគផ្សព្វផ្សាយ និងការចូលរួមកម្មវិធីប្រគល់ពានរង្វាន់ផ្សេងៗ បន្ទាប់ពីទទួលបានភាពជោគជ័យយ៉ាងខ្លាំងពីភាពយន្ត “KPop Demon Hunters”។ អ្វីដែលគួរឱ្យកត់សម្គាល់នោះគឺ ពួកគេចំណាយពេលរៀបចំពិធីមង្គលការនេះត្រឹមតែ ៤ខែប៉ុណ្ណោះ។
Ejae បានរៀបរាប់ប្រាប់ទស្សនាវដ្ដី Vogue អំពីដំណើរការរៀបចំមង្គលការរបស់នាងថា៖ “វាពិតជារវល់ និងតានតឹងបន្តិចមែន ប៉ុន្តែដោយសារតែការសហការគ្នាយ៉ាងល្អ អ្វីៗក៏បានប្រព្រឹត្តទៅយ៉ាងរលូន និងល្អឥតខ្ចោះ។
គួរបញ្ជាក់ផងដែរថា Ejae និង Sam Kim បានជួបគ្នាជាលើកដំបូងកំឡុងពេលធ្វើការរួមគ្នាក្នុងឆ្នាំ ២០១៧ ហើយបានបន្តទំនាក់ទំនងក្នុងនាមជាមិត្តរួមអាជីព និងជាគូស្នេហ៍ មុនពេលសម្រេចចិត្តភ្ជាប់ពាក្យកាលពីខែមិថុនា ឆ្នាំមុន។
Ejae គឺជាអតីតសិក្ខាកាមរបស់ផលិតកម្ម SM Entertainment ហើយនាងក៏ធ្លាប់បាននិពន្ធបទចម្រៀង K-pop ដ៏ល្បីល្បាញជាច្រើនបទ ដូចជាបទ “Psycho” របស់ក្រុម Red Velvet និងបទ “Drama” ព្រមទាំង “Armageddon” របស់ក្រុម aespa ផងដែរ។ លើសពីនេះ នាងទើបតែឈ្នះពានរង្វាន់ Oscar និង Grammy តាមរយៈបទ “Golden” ដែលជាបទចម្រៀងគោលក្នុងរឿង “KPop Demon Hunters” ទៀតផង៕
ប្រែសម្រួល៖ គីរី
