បរទេស៖ នាង Jihyo សមាជិកក្រុមតារាចម្រៀង K-pop នារី TWICE បានប្រកាសជាផ្លូវការថា នាងបានចាកចេញពីផលិតកម្ម JYP Entertainment ដើម្បីទៅបង្កើតទីភ្នាក់ងារ ឬផលិតកម្មគ្រប់គ្រងផ្ទាល់ខ្លួន នេះបើយោងតាមការចេញផ្សាយពីសារព័ត៌មាន Yonhap ថ្ងៃទី២២ ខែតុលា ឆ្នាំ២០២៦ ។
តាមរយៈសំបុត្រសរសេរដោយផ្ទាល់ដៃដែលបានបង្ហោះនៅលើបណ្តាញសង្គម តារាចម្រៀងវ័យ ២៩ឆ្នាំរូបនេះ បានបញ្ជាក់ពីការបញ្ចប់កុងត្រាជាមួយ JYP ដែលជាទ្រនំនាងបានរួមរស់តាំងពីកុមារភាព អស់រយៈពេល ២១ឆ្នាំមកហើយ។
នាងបានសរសេររៀបរាប់យ៉ាងដូច្នេះថា៖ “ខ្ញុំបានបង្កើតផលិតកម្ម ‘Emithaus’។ តាមរយៈផ្ទះថ្មីមួយនេះ ខ្ញុំសង្ឃឹមថានឹងអាចស្វែងយល់ដោយសេរីនូវសមត្ថភាពផ្សេងៗទៀតនៅក្នុងខ្លួនខ្ញុំ ដែលខ្ញុំមិនទាន់បានរកឃើញ។”
នាងបានបន្ថែមទៀតថា៖ “ខ្ញុំនឹងប្រុងប្រយ័ត្នចំពោះរាល់ជម្រើស និងសកម្មភាពនាពេលអនាគត ហើយមានស្មារតីទទួលខុសត្រូវខ្ពស់ជាងមុន ខណៈដែលខ្ញុំកំពុងឈានជើងចេញពីបរិយាកាសដែលធ្លាប់តែស៊ាំ ហើយបន្តការងាររបស់ខ្ញុំតាមរបៀបថ្មីមួយ។”
ជុំវិញការសម្រេចចិត្តនេះ Jihyo មានគម្រោងបន្តពង្រីកអាជីពជាសិល្បការិនីទោល (Solo) ក្រោមការគ្រប់គ្រងរបស់ផលិតកម្មថ្មីរបស់នាង ប៉ុន្តែនាងនឹងនៅតែបន្តចូលរួមគ្រប់សកម្មភាពជាមួយក្រុម TWICE ដដែល។
គួរបញ្ជាក់ថា JYP Entertainment ដែលជាផលិតកម្មយក្សមួយរបស់កូរ៉េខាងត្បូង បានគ្រប់គ្រង និងមើលថែ Jihyo តាំងពីនាងចូលធ្វើជាយុវជនហ្វឹកហាត់ (Trainee) មុនពេលបង្ហាញខ្លួនជាផ្លូវការ (Debut) ជាមួយក្រុម TWICE ក្នុងឆ្នាំ២០១៥ មកម្ល៉េះ។
ប្រែសម្រួល៖ គីរី
