វ៉ាស៊ីនតោន៖ លោក Elon Musk បានថ្លែងកាលពីថ្ងៃអង្គារ (ទី២០ ខែតុលា) ថាលោកនឹងគាំទ្រគម្រោងនៃការច្របាច់បញ្ចូលគ្នារវាងក្រុមហ៊ុន SpaceX និង Tesla ដែលការលើកឡើងនេះបានជំរុញឱ្យភាគហ៊ុនរបស់ក្រុមហ៊ុនអវកាស និងបច្ចេកវិទ្យាមួយនេះកើនឡើង ៨ភាគរយ នៅក្នុងការជួញដូរបន្ថែមម៉ោង នេះបើយោងតាមការចេញផ្សាយពីសារព័ត៌មាន CNAថ្ងៃទី២១ខែតុលា ឆ្នាំ២០២៦ ។
ឆ្លើយតបនឹងសំណួរជុំវិញលទ្ធភាពនៃការរួមបញ្ចូលគ្នានេះ នៅក្នុងកិច្ចសន្ទនាជាមួយក្រុមអ្នកវិភាគ លោក Musk បានប្រៀបប្រដូចស្ថានភាពនេះទៅនឹង «ការរាំទះជើងកាត់ចម្ការមីន» ប៉ុន្តែលោកបានបញ្ជាក់យ៉ាងច្បាស់ថា ការរួមបញ្ចូលគ្នានេះគឺជា «គំនិតដ៏ល្អមួយ»។
ក្រុមហ៊ុននេះទើបតែបានប្រកាសពីប្រាក់ចំណេញជាលើកដំបូងរបស់ខ្លួន ក្នុងនាមជាក្រុមហ៊ុនសាធារណៈ ខណៈលោក Musk បានលើកឡើងថា លោករំពឹងថានឹងមានចំណូលប្រចាំឆ្នាំចន្លោះពី ៥០០ពាន់លានដុល្លារ ទៅ ១ទ្រីលានដុល្លារ នៅត្រឹមចុងឆ្នាំ២០២៧ ស្របពេលដែលតម្រូវការទីតាំងផ្ទុកទិន្នន័យ (Data-centre space) កំពុងកើនឡើងយ៉ាងខ្លាំងដោយសារសន្ទុះនៃការរីកចម្រើនខាងបច្ចេកវិទ្យា AI។
កន្លងមក លោក Musk ធ្លាប់បានធ្វើឱ្យភាគហ៊ុនិកមានការចាប់អារម្មណ៍ជាមួយនឹងគំនិតនៃការច្របាច់បញ្ចូល SpaceX និង Tesla នេះ ដោយលោកបានលើកឡើងពីភាពស្រដៀងគ្នាកាន់តែច្រើនរវាងប្រតិបត្តិការរបស់ក្រុមហ៊ុនទាំងពីរ។
ពាក្យចចាមអារ៉ាមអំពីការទិញយកក្រុមហ៊ុនផលិតរថយន្តអគ្គិសនី (EV) ដោយក្រុមហ៊ុនអវកាសនេះ ទទួលបានការចាប់អារម្មណ៍កាន់តែខ្លាំងនាពេលថ្មីៗនេះ ខណៈធនាគារ Barclays បានព្យាករកាលពីសប្តាហ៍មុនថា កិច្ចព្រមព្រៀងមួយអាចនឹងត្រូវបានប្រកាស មុនកិច្ចប្រជុំប្រចាំឆ្នាំរបស់ Tesla នៅខែធ្នូ។
ជាការបញ្ជាក់ផ្លូវការលើកដំបូងថា ក្រុមហ៊ុនទាំងពីរកំពុងស្ថិតក្នុងការពិភាក្សា លោក Musk បាននិយាយថា គណៈកម្មាធិការពិសេសនៃនាយកឯករាជ្យរបស់ SpaceX និង Tesla ត្រូវបានបង្កើតឡើងរួចរាល់ហើយ ដើម្បីសិក្សាពីគំនិតនេះ ទៅតាមសំណើរបស់ភាគហ៊ុនិក។ ប៉ុន្តែលោកបានបន្ថែមថា លោកមិនអាចចូលរួមក្នុងការពិភាក្សានេះបានទេ ដោយសារតែវាជាបញ្ហាទំនាស់ផលប្រយោជន៍ (Conflict of interest)។
បច្ចុប្បន្ន លោក Musk គឺជានាយកប្រតិបត្តិ (CEO) នៃក្រុមហ៊ុនទាំងពីរ ហើយក៏ជាប្រធានក្រុមប្រឹក្សាភិបាល និងជាប្រធានផ្នែកបច្ចេកវិទ្យា (CTO) របស់ក្រុមហ៊ុន SpaceX ផងដែរ។ ក្នុងនាមជាបុគ្គលមានទ្រព្យសម្បត្តិច្រើនជាងគេបំផុតនៅលើពិភពលោក លោក Musk កាន់កាប់ភាគហ៊ុនជិតមួយភាគប្រាំ (១/៥) នៃក្រុមហ៊ុន Tesla និងជិតពាក់កណ្តាលនៃក្រុមហ៊ុន SpaceX ហើយអ្នកវិភាគបានលើកឡើងថា ការច្របាច់បញ្ចូលគ្នានេះ នឹងផ្តល់ឱ្យលោកនូវអំណាចគ្រប់គ្រងទាំងស្រុងលើស្ថាប័នតែមួយនេះ។
លោក Musk បានព្រមានថា គណៈកម្មាធិការទាំងនេះនៅមិនទាន់ឯកភាពគ្នាលើលក្ខខណ្ឌនៃកិច្ចព្រមព្រៀងណាមួយនៅឡើយទេ ហើយក៏គ្មានការធានាថាពួកគេនឹងយល់ព្រមនោះដែរ ដោយលោកបានបញ្ជាក់ថា វាជារឿងហួសហេតុពេក ប្រសិនបើយើងចាត់ទុកការច្របាច់បញ្ចូលគ្នានេះថាជារឿងប្រាកដប្រជា ១០០% នោះ។ កិច្ចព្រមព្រៀងណាមួយ នឹងត្រូវការការគាំទ្រពីសំឡេងភាគច្រើននៃភាគហ៊ុនទាំងអស់របស់ Tesla (មិនមែនគិតត្រឹមតែភាគហ៊ុនដែលបានបោះឆ្នោតនោះទេ) ដែលលោក Musk ចាត់ទុកថាជា «ឧបសគ្គដ៏ខ្ពស់មួយ»។
ប្រភពដែលដឹងពីបញ្ហានេះបានប្រាប់ទីភ្នាក់ងារព័ត៌មាន Reuters ក្នុងលក្ខខណ្ឌអនាមិកថា ការពិភាក្សាបានចាប់ផ្តើមក្នុងប៉ុន្មានសប្តាហ៍ថ្មីៗនេះ ហើយអាចឈានដល់ការដែល SpaceX ទិញយក Tesla តែម្តង។ ប្រភពដដែលបានបន្ថែមថា Tesla កំពុងធ្វើការជាមួយធនាគារវិនិយោគមួយ ដើម្បីផ្តល់យោបល់លើការពិភាក្សានេះ។
លោក Musk បានសង្កត់ធ្ងន់ថា៖ «ខ្ញុំពិតជាគិតថាវាមានអត្ថប្រយោជន៍ច្រើនណាស់ក្នុងការច្របាច់បញ្ចូលក្រុមហ៊ុនទាំងពីរ ខណៈដែលយើងកំពុងឈានចូលដល់យុគសម័យកំពូលនៃបញ្ញាសិប្បនិម្មិត (Superintelligence singularity) ហើយយើងនឹងទទួលបានអត្ថប្រយោជន៍ជាច្រើនពីកិច្ចសហប្រតិបត្តិការលើការអភិវឌ្ឍផ្នែកទន់ (Software) បញ្ញាសិប្បនិម្មិតកំពូល ការរចនាបន្ទះឈីប រោងចក្រ Terafab មនុស្សយន្ត ប្រព័ន្ធបញ្ជូនវត្ថុទៅកាន់គន្លងតារាវិថីជាមួយបណ្តាញផ្កាយរណប Starmind និងការតភ្ជាប់បណ្តាញទូរគមនាគមន៍»។
ប្រែសម្រួល៖ គីរី
